Gwaith yn dechrau ar Gynllun Gardd Llesiant newydd yn Ysbyty Dyffryn Aman

Yn y Llun: Aelodau Cynghrair Cyfeillion Ysbyty Dyffryn Aman gyda staff yr ysbyty

Mae gwaith wedi dechrau'n swyddogol ar brosiect newydd uchelgeisiol i drawsnewid gardd flaen Ysbyty Dyffryn Aman yn ofod awyr agored therapiwtig sy'n gyfeillgar i ddementia, wedi'i gynllunio i gefnogi adsefydlu cleifion, lles staff ac ymgysylltiad cymunedol.

Bydd y Cynllun Gardd Llesiant yn creu llwybrau synhwyraidd, mannau eistedd hygyrch, ac amgylchedd naturiol tawel sy'n hyrwyddo iachâd ac yn gwella profiadau cleifion wrth gefnogi ymrwymiad yr ysbyty i fannau gwyrdd cynaliadwy a bioamrywiol.

Mae'r prosiect yn cynrychioli buddsoddiad cyfan o bron i £140,000, gyda Chynghrair Cyfeillion Ysbyty Dyffryn Aman yn darparu £114,533, ac Elusennau Iechyd Hywel Dda - elusen swyddogol Bwrdd Iechyd Prifysgol Hywel Dda - yn cyfrannu'r £25,000 sy'n weddill.

Mae'r ardd i agor ym mis Mehefin 2026, a bydd yn rhan o'r dathliadau i nodi 90fed pen-blwydd Ysbyty Dyffryn Aman.

Dywedodd Catherine Rogerson, Cadeirydd Cynghrair Cyfeillion Ysbyty Dyffryn Aman: “Mae cefnogi lles cleifion, teuluoedd a staff wedi bod wrth wraidd yr hyn a wnawn erioed, ac rydym yn hynod falch o fod yn brif gyllidwr yr ardd drawsnewidiol hon.

“Am 90 mlynedd, mae Ysbyty Dyffryn Aman wedi bod yn gonglfaen i'n cymuned, a bydd y gofod therapiwtig newydd hwn yn gwella'r amgylchedd i bawb sy'n ei ddefnyddio. Rydym wrth ein bodd yn gweld y gwaith yn dechrau ac yn edrych ymlaen at yr agoriad swyddogol yr haf hwn.”

Dywedodd Iona Evans, Pennaeth Nyrsio - System Sir Gaerfyrddin ym Mwrdd Iechyd Prifysgol Hywel Dda: “Rydym yn ddiolchgar i Gynghrair Cyfeillion Ysbyty Dyffryn Aman am eu haelioni anhygoel ac am eu hymrwymiad parhaus i wella gofal i bobl leol.

“Bydd y prosiect yn creu manteision ystyrlon i gleifion, staff, a’r gymuned ehangach. Mae mannau awyr agored therapiwtig yn chwarae rhan hanfodol mewn adferiad a lles meddyliol, a bydd yr ardd newydd hon yn cynnig amgylchedd tawel, hygyrch ac adferol i bobl. Allwn ni ddim aros i weld y manteision y bydd yn eu dwyn.”

Mae Cynghrair Cyfeillion Ysbyty Dyffryn Aman yn croesawu unrhyw un sydd ag ychydig o amser i’w sbario i ymuno â’i thîm gwirfoddoli. Bydd eich cefnogaeth yn ein helpu i ofalu am yr Ardd Llesiant newydd hardd hon yn Ysbyty Dyffryn Aman a’i chynnal, gan sicrhau ei bod yn parhau i fod yn lle heddychlon, codi calon i gleifion, ymwelwyr a staff. Am fanylion pellach, cysylltwch â ni dros y ffôn ar 07814 188781 neu e-bostiwch ni:avhlof23@gmail.com.