Ysgol yn codi dros £1,100 ar gyfer Gwasanaeth Diabetes Pediatrig

Yn y llun uchod: Yvonne Davies, Nyrs Arweiniol Diabetes Pediatrig; Swe Lynn, Pediatregydd Ymgynghorol; Aria a Jenson; Cerys Roch, Seicolegydd Cynorthwyol ac Amy Rolinson, Nyrs Arbenigol Diabetes Pediatrig.

Camodd staff a disgyblion o Ysgol Gynradd Tycroes ymlaen i gefnogi plant a phobl ifanc sy'n byw gyda diabetes drwy godi swm anhygoel o £1,143 ar gyfer Gwasanaeth Diabetes Pediatrig Bwrdd Iechyd Prifysgol Hywel Dda.

Trefnodd Carly Price, aelod o staff yn yr ysgol, Step-a-Thon noddedig yn ystod wythnos diabetes ym mis Mehefin i roi rhywbeth yn ôl i'r gwasanaeth sydd wedi helpu ei dau blentyn, Jenson ac Aria, a gafodd ddiagnosis o ddiabetes o fewn mis yn unig i'w gilydd.

Anogodd yr her ddisgyblion a staff i symud wrth godi ymwybyddiaeth o ddiabetes ac arian ar gyfer y Gwasanaeth Diabetes Pediatrig sy'n helpu i gefnogi plant a phobl ifanc sy'n byw gyda diabetes ar draws Hywel Dda.

Dywedodd Katie Hancock, Swyddog Codi Arian: “Diolch yn fawr iawn i Carly, Jenson ac Aria am drefnu Step-a-Thon mor wych i gefnogi'r Gwasanaeth Diabetes Pediatrig.

“Mae eich gwaith caled a'ch ymroddiad wedi bod yn wirioneddol ysbrydoledig. Hoffem hefyd longyfarch pawb yn Ysgol Tycroes am gymryd rhan a helpu i godi swm mor anhygoel o arian. Bydd pob rhodd yn gwneud gwahaniaeth gwirioneddol i blant a phobl ifanc sy'n byw gyda diabetes, ac rydym mor ddiolchgar am eich cefnogaeth. Da iawn bawb!

“Nid yw'r rhoddion elusennol hael a dderbyniwn yn disodli cyllid y GIG. Yn lle hynny, fe'u defnyddir i ddarparu eitemau a gweithgareddau y tu hwnt i wariant craidd y GIG.”