Gweithio gyda'ch busnes
Uchod: Staff Oil 4 Wales yn ymuno â’r llysgenhadon Steff Evans a Sam Costelow o Rygbi Scarlets i ddosbarthu rhai anrhegion Nadolig gwych i’r plant ar Ward Cilgerran yn Ysbyty Glangwili. Casglwyd yr anrhegion yn ystod eu Hymgyrch Teganau Nadolig, a oedd yn cefnogi gwasanaethau plant ar draws Sir Gaerfyrddin, Ceredigion a Sir Benfro.
Mae’n debygol iawn y bydd eich cwsmeriaid, gweithwyr neu gleientiaid, neu eu hanwyliaid, wedi elwa o roddion a wnaed i Elusennau Iechyd Hywel Dda ar ryw adeg yn eu bywydau.
Mae partneriaeth ag Elusennau Iechyd Hywel Dda yn cynnig potensial enfawr ar gyfer rhoi gwerth i'ch rhaglenni cyfrifoldeb cymdeithasol corfforaethol (CSR). Gallwn helpu eich sefydliad drwy ymgysylltu â gweithwyr, cyhoeddusrwydd, a hyrwyddo eich ymdrechion dyngarol yn eich ardal leol.
Mae pob partneriaeth a ffurfiwn gyda busnes lleol yn unigryw ac yn seiliedig ar amgylchiadau unigol. Mae gennym ddiddordeb bob amser mewn trafod meysydd o gydweithio boed yn ymwneud â nawdd neu gyfrannu nwyddau neu wasanaethau.
Elusen y flwyddyn
Beth am ystyried Elusennau Iechyd Hywel Dda yn Elusen y Flwyddyn o’ch dewis – ffordd wych o ddod â’ch holl weithlu ynghyd i ddatblygu cyfres o weithgareddau codi arian?
Cyfleoedd noddi
Mae gennym bob amser amrywiaeth o brosiectau a datblygiadau a fyddai’n briodol ar gyfer cymorth corfforaethol:
- Noddi gwasanaeth penodol
- Helpu i wella amgylchedd ein hysbytai
- Prynu darn o offer meddygol arbenigol
- Cefnogi ein gwirfoddolwyr
- Darparu cymorth i sefydliadau trydydd sector lleol i ddarparu gwasanaethau gofal iechyd yn nes at adref.
Os ydych eisoes wedi cynllunio neu'n cynllunio digwyddiad codi arian yn eich cwmni, byddem wrth ein bodd yn clywed gennych i drafod cydweithio er budd eich cymuned leol.
Digwyddiadau tîm
Mae gennym leoedd am ddim ar gael i godwyr arian mewn nifer o ddigwyddiadau trwy gydol y flwyddyn - beth am ymuno â thîm a chreu profiad adeiladu tîm gwych wrth godi arian?
Cynllun rhoi yn y gweithle
Newid Mân yn dod yn Newid Mawr!
Mae’r cynllun yn cymryd ambell geiniog o gyflog misol gweithwyr ac yn rhoi’r rhain ar eu rhan i elusen.
Er enghraifft, pe bai gweithiwr yn ennill £895.38 ac os yw wedi dewis ymuno â'r cynllun, byddai'n cadw'r £895 a byddai'r 38c yn cael ei roi i'r elusen enwebedig. Yr isafswm rhodd misol fyddai 1c a'r rhodd fisol uchaf fyddai 99c.
I ddarganfod sut y gallwch ymuno â Newid Mân, Newid Mawr fel cyflogwr ac enwebu Elusennau Iechyd Hywel Dda fel eich elusen ddewisol, cysylltwch â ni. Am fwy o wybodaeth ewch i: Join the hive - Microhive
Cysylltwch
I drafod sut y gall eich busnes gefnogi eich elusen GIG, cysylltwch â ni! Byddem wrth ein bodd yn clywed gennych.
Partneriaid corfforaethol
Dyma rai enghreifftiau o sut rydym wedi partneru'n llwyddiannus â busnesau i ddarparu buddion i'n cymunedau lleol:
Partneriaeth Elusen y Flwyddyn
Dewisodd Cyfrifwyr LHP Elusennau Iechyd Hywel Dda fel elusen y flwyddyn i godi arian ar gyfer yr Uned Gofal Arbennig Babanod a'r Uned Cemotherapi yn Ysbyty Glangwili er cof am eu cydweithiwr annwyl, Elin. Trefnodd staff amrywiaeth o ddigwyddiadau codi arian drwy gydol y flwyddyn, gan gynnwys Diwrnod Golff, raffl, beicio noddedig a gêm bêl-droed.
Dywedodd Cyfarwyddwyr LHP: "Mae codi arian er cof am ein cydweithiwr, Elin, wedi bod yn ffordd arbennig iawn i ni ddathlu ei bywyd a chofio'r cyfraniad a wnaeth i'n tîm. Hoffem ddiolch i Elusennau Iechyd Hywel Dda am yr anogaeth a'r gefnogaeth maen nhw wedi'i roi drwy'r amser. Mae gwybod y bydd yr arian a godir o fudd i gleifion, teuluoedd a staff ar draws yr Uned Cemotherapi a'r Uned Gofal Arbennig Babanod yng Nglangwili wedi rhoi hyd yn oed mwy o ystyr i'n hymdrechion, ac rydym yn falch o chwarae rhan fach wrth gefnogi'r gwaith hanfodol hwn."
Partneriaethau ymgyrchu
Trwy gefnogi ein hymgyrch Cronfa Ddymuniadau, mae Rygbi'r Scarlets yn ein helpu i godi arian ar gyfer profiadau bythgofiadwy i blant sydd â chyflyrau sy'n cyfyngu ar fywyd ac sy'n peryglu bywyd, gan alluogi teuluoedd lleol i greu atgofion gwerthfawr gyda'i gilydd yn ystod cyfnodau anhygoel o heriol. Dywedodd Gareth Davies, chwaraewr rhyngwladol Cymru y Scarlets: "Rydym yn falch iawn o fod yn rhan o'r ymgyrch Y Gronfa Ddymuniadau a gobeithio y gallwn helpu i wneud gwahaniaeth gwirioneddol i deuluoedd ledled canolbarth a gorllewin Cymru."
Ymgysylltu â chwsmeriaid
Yn ystod ymgyrch Delivering Joy Dunelm Caerfyrddin, rhoddodd cwsmeriaid hael anrhegion i blant a phobl ifanc sy'n derbyn gofal dros gyfnod y Nadolig. Roedd eu coeden Nadolig wedi'i hongian â thagiau elusennol, gyda phob un yn disgrifio anrheg a ddymunwyd gan glaf ifanc. Roedd yn ffordd wych o ennyn diddordeb cwsmeriaid mewn achos da, a chawsom gannoedd o anrhegion gwych a ddaeth â gwên i wynebau ein cleifion ifanc!
Anfon diolch
Cododd aelodau teulu a chydweithwyr Alun Rees Thomas, perchennog A&B Tool Hire, dros naw mil o bunnoedd er cof amdano ar ôl iddo farw'n anffodus. Codwyd yr arian drwy amrywiaeth o ddigwyddiadau codi arian fel raffl yn y Sioe Frenhinol a'u taith tractorau blynyddol - ymdrech dîm wych i ddiolch am y gofal rhagorol a gafodd Alun yn uned cemotherapi Ysbyty Tywysog Philip.
Bod yn greadigol
Yn ystod ymgyrch Llenwi Sgip Grŵp Gavin Griffiths, casglodd y cwmni nifer o anrhegion i'r plant yn Ysbyty Glangwili – ac yna dosbarthu yn y sgip! Daeth y dosbarthiad â llawer iawn o lawenydd i'r cleifion ifanc a chafodd ymateb gwych ar y cyfryngau cymdeithasol.
Ariannu prosiectau pwysig
Derbyniodd ein menter Therapi Syrffio Tonic £1,500 gan Grant Cychwyn Cryfach Tesco, gan alluogi plant a phobl ifanc rhwng 14 a 25 oed ymuno â sesiynau therapi syrffio wythnosol a ddarperir gan Ysgol Syrffio Tonic Surf a Walkin' on Water, mewn partneriaeth â Gwasanaethau Iechyd Meddwl Plant a Phobl Ifanc Bwrdd Iechyd Hywel Dda (CAMHS). Cafodd y cwrs 10 wythnos effaith gadarnhaol iawn ar iechyd meddwl a lles y cyfranogwyr a dangosodd ymrwymiad Tesco i gefnogi ei gymuned leol.
Rhoddion hael
Mae Princes Gate Water wedi rhoi poteli o ddŵr yn garedig i'n codwyr arian gwych sy'n cymryd rhan mewn digwyddiadau Penwythnos Cwrs Hir Cymru, gan eu hydradu yn ystod eu heriau codi arian.