Elusen y GIG yn ariannu technoleg newydd ar gyfer Ysbyty Bronglais i helpu i frwydro yn erbyn clefyd yr afu

Yn y llun, o'r chwith i'r dde, gyda'r sganiwr ffeibr: Rhian Jones, Nyrs Cyswllt Alcohol; Zoe Merritt, Nyrs Cyswllt Alcohol Golau Glas; Donna Blinston, Uwch Ymarferydd Nyrsio Hepatoleg.

Diolch i'ch rhoddion hael, mae Elusennau Iechyd Hywel Dda - elusen swyddogol Bwrdd Iechyd Prifysgol Hywel Dda - wedi ariannu sganiwr ffeibr newydd gwerth dros £80,000 ar gyfer Ysbyty Cyffredinol Bronglais i helpu i wneud diagnosis a rheoli clefyd yr afu.

Mae sganiwr ffeibr yn beiriant uwchsain arbenigol ar gyfer yr afu/iau sy'n mesur ffibrosis (creithiau) a steatosis (newid brasterog) yn yr afu/iau. Mae’n brawf anfewnwthiol sy’n graddoli difrifoldeb clefyd yr afu claf ac yn cefnogi rheoli cyflyrau mewn cleifion â chlefyd cronig yr afu.

Bydd y sganiwr ffibr newydd o'r radd flaenaf yn darparu'r dechnoleg ddiweddaraf i gleifion ym Mronglais. Mae’r peiriant yn symudol a gellir mynd ag ef i’r gymuned i glinigau camddefnyddio sylweddau, clinigau meddygon teulu a chartrefi cleifion; mae ganddo hefyd nodweddion uwch ac offer diagnostig a all gyflymu diagnosis clefyd yr afu.

Dywedodd Donna Blinston, Uwch Ymarferydd Nyrsio Hepatoleg: “Mae clefyd yr afu yn bennaf yn glefyd anweledig nes iddo ddod yn fwy datblygedig, ac os na chaiff ei ddiagnosio a heb ei drin, mae cleifion yn mynd ymlaen i ddatblygu sirosis yr afu na ellir ei wrthdroi.

“Bydd y sganiwr ffibr newydd o fudd mawr i gleifion yn nalgylch Bronglais, gan sicrhau eu bod yn elwa ar y dechnoleg ddiweddaraf ac yn gallu cael sganiau amserol mewn lleoliadau lleol.”

Dywedodd Nicola Llewelyn, Pennaeth Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda: “Mae cefnogaeth ein cymunedau lleol yn ein galluogi i ddarparu gwasanaethau y tu hwnt i’r hyn y gall y GIG ei ddarparu yn nhair sir Hywel Dda a rydym yn hynod ddiolchgar am bob rhodd a dderbyniwn.”