Myfyriwr yn adeiladu cegin fwd ar gyfer Ward Cilgerran

Yn y llun uchod: Staff o'r ward, staff o Wasanaeth Cymorth Ieuenctid Sir Gaerfyrddin a Billy Bilton.

Mae myfyriwr wedi creu offer chwarae pren newydd ar gyfer Ward Cilgerran yn Ysbyty Glangwili.

Dyluniodd ac adeiladodd Billy Bilton, myfyriwr sy'n gweithio tuag at achrediad adeiladu a gwaith saer, gegin fwd bwrpasol a bwrdd gweithgareddau fel rhan o waith elusennol a drefnwyd trwy Wasanaeth Cymorth Ieuenctid Sir Gaerfyrddin. Mae'r prosiect hefyd yn rhan o bortffolio Billy wrth iddo baratoi ar gyfer cyfweliad coleg sydd ar ddod.

Ar ôl siarad â staff, fe wnaethant nodi angen am offer chwarae awyr agored newydd i wella gardd y ward. Cymerodd Billy yr her, gan ddylunio ac adeiladu cegin fwd newydd wych a theganau gardd pren.

Bydd yr offer yn darparu cyfleoedd chwarae hwyliog a chreadigol i blant ac yn helpu i wneud yr amser a dreulir ar y ward yn fwy pleserus i gleifion a'u teuluoedd.

Dywedodd Katie Hancock, Swyddog Codi Arian: “Diolch yn fawr iawn i Billy am roi ei amser a'i ymdrech i adeiladu teganau gardd pren ar gyfer ward y plant. Bydd y staff, y plant a'r teuluoedd yn hynod ddiolchgar.

“Nid yw'r rhoddion elusennol hael a dderbyniwn yn disodli cyllid y GIG. Yn hytrach, fe'u defnyddir i ddarparu eitemau a gweithgareddau y tu hwnt i wariant craidd y GIG, megis amgylcheddau mwy croesawgar i gleifion, teuluoedd a staff, ac ymchwil i driniaethau, a'u datblygu.”