Elusen GIG yn helpu i drawsnewid ystafell dawel Ward Meurig

Mae Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda, wedi helpu i greu amgylchedd mwy croesawgar a chefnogol i gleifion a'u hanwyliaid ar Ward Meurig yn Ysbyty Bronglais.

Mae cyllid elusennol wedi galluogi'r ward i brynu amrywiaeth o eitemau i wella ei hystafell dawel, gan gynnwys cadeiriau breichiau cyfforddus a bwrdd coffi, celf wal bwrpasol yn cynnwys traeth Mwnt, a chyfleusterau ar gyfer lluniaeth, gan gynnwys peiriant coffi.

Mae'r ystafell dawel yn darparu lle pwrpasol lle gall perthnasau dreulio amser i ffwrdd o amgylchedd y ward tra bod eu hanwyliaid yn derbyn gofal. Fe'i defnyddir hefyd gan staff wrth gynnal sgyrsiau sensitif gyda chleifion a theuluoedd. Mae'r gwelliannau wedi'u cynllunio i greu awyrgylch tawelu sy'n cynnig cysur, preifatrwydd a chefnogaeth emosiynol yn ystod yr hyn a all fod yn aml yn gyfnod anodd a gofidus.

Dywedodd Ellen Masters, Gweinyddwr y Ward: “Rydym yn ddiolchgar iawn am y rhoddion hael gan ein cymunedau lleol sydd wedi galluogi Elusennau Iechyd Hywel Dda i ddarparu cyllid i wella'r gwasanaeth a ddarparwn ar y ward.

“Mae ein hystafell dawel wedi trawsnewid yn amgylchedd mwy heddychlon a chroesawgar lle gall pobl gymryd eiliad i ffwrdd o'r lleoliad clinigol, myfyrio, a threulio amser gydag anwyliaid. Gall cael lle tawel a chyfforddus lle gall cleifion a pherthnasau orffwys, siarad yn breifat, neu gymryd seibiant wneud gwahaniaeth mawr yn ystod yr hyn sydd yn aml yn gyfnod emosiynol a phryderus. "Rydym yn hynod ddiolchgar am y cyllid, sydd wedi ein helpu i greu lle sy'n hyrwyddo cysur, lles a chefnogaeth emosiynol i'r rhai sydd ei angen fwyaf."

Dywedodd Nicola Llewelyn, Pennaeth Elusennau Iechyd Hywel Dda: “Dyma'r enghraifft berffaith o sut mae eich rhoddion hael yn ein galluogi i greu amgylcheddau mwy croesawgar i gleifion, teuluoedd a staff. Rydym yn hynod ddiolchgar am y gefnogaeth sy'n ein galluogi i gyflawni hyn.

“Mae cefnogaeth ein cymunedau lleol yn ein galluogi i ddarparu gwasanaethau y tu hwnt i'r hyn y gall y GIG ei ddarparu yn nhai sir Hywel Dda ac rydym yn hynod ddiolchgar am bob rhodd a dderbyniwn.”