Mam leol yn mynd ar daith gerdded elusennol 15 milltir i gefnogi gofal ei merch
Yn y llun uchod: Marged, merch Gwenllian.
Mae Gwenllian Evans, mam 30 oed i ddau o blant, yn cymryd rhan mewn Taith Gerdded Rotari Ar Draws Cymru i godi arian ar gyfer Ward Angharad yn Ysbyty Bronglais.
Mae Gwenllian yn byw gyda'i dau o blant, Marged a Gethin ac yn gweithio mewn Cylch Meithrin. Dros y ddwy flynedd ddiwethaf, mae hi wedi darganfod angerdd dros gerdded a heicio, gan adeiladu ei ffitrwydd yn raddol o bellteroedd byr i lwybrau llawer hirach.
Nawr, mae hi'n gwthio ei hun ymhellach fyth trwy fynd ar daith gerdded 15 milltir, ei phellter hiraf hyd yn hyn, i roi rhywbeth yn ôl i'r ward sy'n gofalu am ei merch, Marged, a gafodd ddiagnosis o Hyperplasia Adrenal Cynhenid ym mis Awst 2025.
Dywedodd Gwenllian: “Rwy'n cymryd rhan yn Nhaith Gerdded Rotari Ar Draws Cymru ar 20 Mehefin 2026. Byddaf yn cerdded 15 milltir, o Aberhafesb i Drefaldwyn.
“I mi, mae 15 milltir yn beth mawr. Ddwy flynedd yn ôl, pan ddechreuais, prin y gallwn gerdded tair milltir, hyd heddiw 11 milltir yw fy hiraf.
“Mae Hyperplasia Adrenal Cynhenid yn gyflwr prin sy'n effeithio ar y chwarennau adrenal, gan achosi anghydbwysedd hormonaidd sydd angen gofal meddygol a meddyginiaeth gydol oes, a gofal brys rhag ofn argyfwng adrenal, gan y gall hyn fod yn angheuol os na chaiff ei drin.
“Cafodd fy merch ddiagnosis yng Nghaerdydd ond rydym yn dibynnu ar Ward Angharad i Marged gael ei phrofion gwaed, pigiadau a gofal brys os bydd ei hangen arni erioed. Mae hi wedi cael ei derbyn unwaith i ofal brys ers ei diagnosis.
“Datblygodd Marged ffobia nodwyddau yng Nghaerdydd a phob tro y bu’n rhaid iddi gael prawf gwaed neu bigiad, mae’r tîm yn Ward Angharad wedi bod yn wych am wneud iddi deimlo’n gartrefol, gan ei chofio, rhoi anrheg fach iddi am fod mor ddewr, a darparu gofal cyffredinol rhagorol. Mae hi bellach yn dechrau dod i arfer â nodwyddau ac yn gwybod pa mor ddewr ydyw.
“Fy nharged oedd £100 ac rydw i wedi codi £120. Byddai’n wych cyrraedd £200.”
Dywedodd Paige Denyer, Swyddog Cymorth Codi Arian: “Mae her Gwenllian yn wirioneddol ysbrydoledig, dymunwn y gorau iddi ar y diwrnod.
“Mae cefnogaeth ein cymunedau lleol yn ein galluogi i ddarparu gwasanaethau y tu hwnt i’r hyn y gall y GIG ei ddarparu yn nhai sir Hywel Dda ac rydym yn hynod ddiolchgar am bob rhodd a dderbyniwn.”
Gallwch gyfrannu at ymgyrch codi arian Gwenllian yma: https://www.justgiving.com/page/gwenllian-evans-1