Mae'r grŵp beicio modur yn ariannu £15k i wella ardal chwarae ward plant

Yn y llun uchod: Aelodau o Grŵp Beicio Modur 3 Amigos and Dollies yn ymuno â staff ward Cilgerran wrth iddynt ailwampio’r man chwarae awyr agored

Diolch i waith codi arian gwych gan Grŵp Beicio Modur 3 Amigos and Dollies yn Sir Benfro, mae Elusennau Iechyd Hywel Dda wedi gallu ariannu’r gwaith o wella’r ardal chwarae awyr agored yn ward plant Cilgerran yn Ysbyty Glangwili ar gost o dros £15,000.

Mae Grŵp Beicio Modur 3 Amigos and Dollies wedi bod yn codi arian ar gyfer gwasanaethau plant Bwrdd Iechyd Prifysgol Hywel Dda ers chwarter canrif. Mae eu teithiau teganau Pasg a Nadolig wedi dod yn ddyddiau i ddathlu yn y calendr, gan ddenu cannoedd o feicwyr a chefnogwyr bob blwyddyn.

Mae'r cyllid wedi talu am welliant gwirioneddol dyrchafol i'r ardal chwarae awyr agored gan gynnwys ail-wneud y wal graffiti, teganau newydd, offer chwarae newydd, tŷ haf, ramp symudol ar gyfer mynediad haws, storfa y mae mawr ei hangen, a mwy.

Fe wnaeth aelodau o Grŵp Beicio Modur 3 Amigos and Dollies hyd yn oed dorchi eu llewys i helpu i beintio a diweddaru'r gofod eu hunain.

Dywedodd Paula Goode, Cyfarwyddwr Gwasanaeth ar gyfer Gofal wedi’i Gynllunio a Gofal Arbenigol: “Rydym mor ddiolchgar i Grŵp Beicio Modur 3 Amigos and Dollies am eu cefnogaeth anhygoel i wella’r ardal awyr agored. Nid yn unig y maent wedi codi swm anhygoel ar gyfer y ward, ond maent hefyd wedi gwirfoddoli eu hamser i’n helpu i wneud y gofod awyr agored mor arbennig â phosibl.

“Mae chwarae yn yr awyr agored yn darparu cymaint o fuddion i blant ar y ward: mae’n lleihau straen a phryder ac yn creu cyfleoedd i gwrdd a chwarae gyda ffrindiau newydd sy’n mynd trwy sefyllfaoedd tebyg. Mae’n bwysig i iechyd corfforol a meddyliol ein cleifion, felly ni allem fod yn hapusach gyda thrawsnewid yr ardal chwarae.”

Dywedodd Tobi Evans, Gwirfoddolwr gyda Grŵp Beicio Modur 3 Amigos and Dollies: “Oherwydd haelioni pawb sydd wedi cyfrannu, rydym yn gallu rhoi miloedd bob blwyddyn. Rydym bob amser mor wylaidd gyda’r swm y mae pobl yn ei roi ac rydym yn gwybod mai diolch iddyn nhw ein bod wedi cyrraedd ein 25ain flwyddyn.”

Dywedodd Katie Hancock, Swyddog Codi Arian Elusennau Iechyd Hywel Dda: “Ni allwn ddiolch digon i Grŵp Beicio Modur 3 Amigos and Dollies am eu cefnogaeth i ward Cilgerran. Rydych wedi rhoi gwên ar gynifer o wynebau. Diolch yn fawr!”