Gweithwyr gofal iechyd o Ysbyty Tywysog Philip yn ymgymryd â nifer o heriau dros elusen

Yn y llun uchod: Tîm Anadlol Ysbyty Tywysog Philip yn herio Pen y Fan.

Mae tîm gofal iechyd Hywel Dda yn codi arian i'r rhai sy'n byw gyda salwch anadlol ledled gorllewin Cymru trwy ymgymryd â nifer o heriau dringo.

Mae aelodau staff o Adran Resbiradol Ysbyty Tywysog Philip yn codi arian ar gyfer eu gwasanaeth ac yn codi ymwybyddiaeth o afiechydon resbiradol trwy wneud amrywiol weithgareddau, gan gynnwys cerdded mynyddoedd Cymru a rhedeg.

Mae'r tîm eisoes wedi concro Pen y Fan ac wedi cwblhau digwyddiad 10k Llanelli. Nesaf ar eu rhestr yw dringo Corn Du, Cribyn a Fan y Big.

Mae'r gweithwyr gofal iechyd proffesiynol yn gweithio i'r Adran Resbiradol o fewn Bwrdd Iechyd Prifysgol Hywel Dda ac yn cefnogi cleifion sy'n byw gydag asthma, COPD a chyflyrau resbiradol eraill.

Eu nod yw codi arian ar gyfer yr adran trwy ymgymryd â heriau lluosog.

Dywedodd Kelly Diana, Nyrs Resbiradol: “Rydym yn codi arian trwy wneud amrywiol weithgareddau fel dringo Corn Du, Pen Y Fan, Cribyn, Fan Y Big a rhedeg i wella adnoddau ein hadran - o offer ychwanegol a deunyddiau addysg cleifion i brosiectau arloesol sy'n helpu pobl i anadlu'n haws a byw bywydau iachach.

“Mae pob rhodd, mawr neu fach, yn cyfrannu'n uniongyrchol at wella gofal cleifion a chefnogi ein tîm gweithgar i barhau â'r gwaith hanfodol hwn.”

Ychwanegodd: “Gyda'n gilydd, gallwn wneud gwahaniaeth gwirioneddol i'r rhai sy'n byw gydag afiechydon resbiradol ledled Gorllewin Cymru. Diolch am ein helpu ni i helpu eraill – un anadl ar y tro.”

Dywedodd Claire Rumble, Swyddog Codi Arian Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda: “Diolch i bawb o’r Adran Resbiradol sydd wedi ymgymryd â’r heriau gwych hyn! Allwn ni ddim aros i glywed canlyniad pob her.

“Rydym yn ddiolchgar iawn am bob rhodd a dderbyniwn, ni waeth pa mor fach neu fawr. Nid yw’r rhoddion elusennol a dderbyniwn yn disodli cyllid y GIG. Fe’u defnyddir i ddarparu eitemau a gweithgareddau y tu hwnt i wariant craidd y GIG.”