Elusen y GIG yn ariannu diwrnod lles i rieni a gofalwyr
Mae'r Gronfa Ddymuniadau yn fenter a ddarperir gan Elusennau Iechyd Hywel Dda sy'n creu atgofion parhaol i blant a phobl ifanc sydd â chyflyrau sy'n peryglu bywyd ac sy'n cyfyngu ar fywyd a'u teuluoedd.
Diolch i'r cyllid, ymwelodd y teuluoedd a'r gofalwyr â Gwesty St Brides ym mis Gorffennaf 2025 ar gyfer seibiant mawr ei angen a oedd yn cynnwys sesiwn baddon sain, cinio a defnyddio'r Sba.
Dywedodd Rachel Brown, Arbenigwr Chwarae Gofal Lliniarol Pediatrig: "Rydym mor ddiolchgar am y rhoddion hael i'r Gronfa Ddymuniadau a'n galluogi i drefnu'r profiad hwn ar gyfer y rhieni a'r gofalwyr rydyn ni'n eu cefnogi.
"Mae gofalu am blentyn sy'n ddifrifol wael yn brofiad emosiynol a chorfforol heriol, ac yn aml yn gadael rhieni heb fawr o amser i ganolbwyntio ar eu lles eu hunain. Mae llawer yn wynebu lefelau uchel o straen, gorbryder ac ynysu, a all effeithio ar eu gallu i ddarparu gofal.
"Roedd y diwrnod hwn yn brofiad arbennig i'r rhieni a'r gofalwyr rydyn ni'n eu cefnogi. Roedden nhw'n gallu ymlacio, gofalu amdanynt eu hunain, camu i ffwrdd o'u cyfrifoldebau dyddiol, cysylltu ag eraill sy'n deall eu taith, a chymryd rhan mewn gweithgareddau sy'n hyrwyddo ymlacio ac iachâd emosiynol."
Dywedodd rhiant a fynychodd ddiwrnod rhieni a gofalwyr: "Roedd yr holl brofiad yn anhygoel o'r dechrau i'r diwedd."
Dywedodd Katie Hancock, Swyddog Codi Arian: "Dyma beth yw'r Gronfa Ddymuniadau, gan ddarparu mentrau a gwasanaethau lles ychwanegol i'r teulu cyfan.
"Rydym yn hynod falch o fod wedi ariannu diwrnod mor wych i rieni a gofalwyr plant a phobl ifanc gyda chefnogaeth y Tîm Gofal Lliniarol Pediatrig. Edrychwn ymlaen at ariannu mwy o deithiau fel hyn yn y dyfodol.
"Mae cefnogaeth ein cymunedau lleol yn ein galluogi i ddarparu gwasanaethau yn ychwanegol at yr hyn y gall y GIG ei ddarparu yn nhrair sir Hywel Dda ac rydym yn hynod ddiolchgar am bob rhodd a dderbyniwn."