Digwyddiadau gyrfa chwist yn codi dros £5,200 i Ysbyty Glangwili

Yn y llun uchod: Llun 1: Cyng Tyssul Evans a Susan Childs (mam Elin) gyda Claire Rumble, Swyddog Codi Arian.

Llun 2: Staff o Uned Cemo Glangwili gyda’r Cyng Tyssul Evans a Susan Childs.

Mae’r Cynghorydd Tyssul Evans wedi codi’r swm anhygoel o £5,252 i Ysbyty Glangwili trwy drefnu cyfres o ddigwyddiadau gyrfa chwist cymunedol er cof am ei ffrind, Elin Ludgate.

Yn drist iawn bu farw Elin, 31 oed, ar Ddydd Gŵyl Dewi yn 2025. Gan anrhydeddu dymuniadau teulu Elin, mae’r arian wedi’i rannu’n gyfartal rhwng dau wasanaeth sy’n agos at eu calonnau – yr Uned Ddydd Cemotherapi a’r Uned Gofal Arbennig i Fabanod (SCBU) yn Ysbyty Glangwili.

Dywedodd y Cynghorydd Evans: “Yn dilyn marwolaeth drist ffrind ifanc, Mrs Elin Ludgate, penderfynais ofyn am grant gan Gyngor Sir Caerfyrddin i noddi cynnal cyfres o ddigwyddiadau gyrfa chwist ar draws ein Sir. Cafodd Elin driniaeth yn Uned Cemotherapi Glangwili a rhoddodd enedigaeth i fabi dim ond dau fis cyn ei marwolaeth drist hefyd yn Ysbyty Glangwili.

“Cawsom £1,000 gan y cyngor a alluogodd i mi a nifer o ffrindiau fwrw ati i godi arian ar gyfer y ddwy uned.

“Cynhaliwyd chwe digwyddiad gyrfa chwist yn Neuadd Pontiets, Neuadd Llangadog, Neuadd Llanddeusant, Neuadd Brechfa, Cwrt Henri a Neuadd Cwmifor.

“Hoffwn ddiolch i Gyngor Sir Caerfyrddin am y grant a oedd yn talu am holl gostau’r lleoliad a hefyd yr holl wirfoddolwyr niferus yn y chwe lleoliad gwahanol a roddodd lawer o ymdrech i godi arian.”

Dywedodd Alex Tipping, Rheolwr Ward ar SCBU: “Hoffem fynegi ein diolch o galon am eich haelioni anhygoel wrth godi arian ar gyfer yr Uned Gofal Arbennig i Fabanod yn Ysbyty Cyffredinol Glangwili.

“Rydym yn wirioneddol ddiolchgar eich bod wedi dewis cefnogi ein huned, bydd eich caredigrwydd yn gwneud gwahaniaeth ystyrlon i’r babanod a’r teuluoedd rydym yn gofalu amdanynt. Mae ymdrechion codi arian fel eich un chi yn hanfodol i’n helpu i wella ansawdd y gofal a’r profiad cyffredinol i’r rhai sydd angen ein cymorth yn ystod cyfnod mor dyngedfennol.”

Dywedodd Jessica Michael, Uwch Brif Nyrs yn yr Uned Cemotherapi, “Ar ran staff a chleifion yr Uned Ddydd Cemotherapi yn Ysbyty Glangwili, hoffwn ddiolch i chi am eich ymdrechion codi arian a arweiniodd at rodd hael iawn.

“Rydym bob amser yn edrych ar ffyrdd o wella’r amgylchedd a gwella’r ffordd yr ydym yn gofalu am gleifion yn yr Uned Ddydd Cemotherapi. Gallwn eich sicrhau y bydd yr arian hwn yn mynd tuag at y gwelliant hwn.”

Dywedodd Claire Rumble, Swyddog Codi Arian: “Diolch yn fawr iawn i’r Cynghorydd Tyssul Evans am ymdrech mor anhygoel i godi arian er cof am Elin.

“Mae cefnogaeth ein cymunedau lleol yn ein galluogi i ddarparu gwasanaethau y tu hwnt i’r hyn y gall y GIG ei ddarparu yn nhair sir Hywel Dda ac rydym yn hynod ddiolchgar am bob rhodd a dderbyniwn.”