Beicwyr yn codi dros £5,000 ar gyfer Uned Ddydd Cemotherapi Tywysog Philip

Mae grŵp o ffrindiau wedi ymgymryd â her epig er cof am ffrind a chydweithiwr annwyl – maen nhw wedi beicio hyd Cymru, o'r gogledd i'r de.

Fe wnaeth y beicwyr feicio o Fangor i Gasllwchwr, ger Llanelli, i godi arian ar gyfer yr Uned Ddydd Cemotherapi yn Ysbyty Tywysog Philip, lle cafodd y ffrind a'r cydweithiwr Wayne Evans ei drin.

Cododd grŵp beicio WE N2S (Wayne Evans Gogledd i'r De) swm enfawr o £5,036 ar gyfer yr uned, gan ymweld â threfi ledled y wlad, gan gynnwys Aberystwyth a Phorth Tywyn.

Cafodd Wayne ddiagnosis o ganser y pancreas datblygedig ym mis Awst 2022, ac roedd hyn yn golygu na allai gwblhau Ironman Cymru y mis Medi hwnnw. Er gwaethaf cyfnod anhygoel o heriol, roedd yn benderfynol o barhau i ddilyn ei angerdd dros driathlon ac aeth ymlaen i gwblhau Triathlon Abertawe a Llanelli fel rhan o dîm lle'r oedd yn rhedeg neu'n cerdded y 5k, wrth godi arian.

Wedi'i ysbrydoli gan gryfder eu ffrind, cymerodd y trefnydd Sarah Mountfield a gweddill y beicwyr eu her feicio eu hunain am y tro cyntaf ym mis Awst 2023, lle fe wnaethant feicio o'r gogledd i'r de. Wrth wneud hynny, fe godon nhw dros £3,000 ar gyfer Uned Cemotherapi Ysbyty Tywysog Philip a phenderfynon nhw ei wneud eto ym mis Awst 2024, lle fe godon nhw hyd yn oed mwy o arian.

Dywedodd Sarah fod y daith feicio yn 2025 – a gynhaliwyd dros ŵyl banc mis Awst – yn “hwyl, yn heriol ac yn werth chweil” ac roedden nhw’n falch o ragori ar eu swm targed o £5,000 eleni.

Esboniodd: “Yn dilyn teithiau llwyddiannus y ddwy flynedd ddiwethaf, fe benderfynon ni ymgymryd â’r her eto i godi arian ar gyfer yr Uned Cemotherapi, gan godi swm syfrdanol o £5,036 er cof am ein ffrind annwyl Wayne.”

“Roedd yn deyrnged addas i Wayne, dyn rhyfeddol sy’n parhau i ysbrydoli llawer,” ychwanegodd. “Mae’r llwybr yn anhygoel o heriol, ond fe wnaethon ni gefnogi ein gilydd a llwyddo i oroesi.”

Dywedodd Kath Watkins, Uwch Brif Nyrs: “Ar ran y staff a’r cleifion yn yr Uned Ddydd Cemotherapi yn Ysbyty Tywysog Philip, hoffwn ddiolch i dîm WE N2S am eu her feicio nodedig a’u rhodd wych o dros £5,000.”