Her 24 awr yn codi dros £6,000 i ward plant Cilgerran
Yn ddiweddar, cymerodd staff o Adran Ystadau Ysbyty Glangwili a'r busnes Cymreig Wales Roofing Solutions ran yn Her Tri Chopa Cymru, her anodd iawn, i godi arian ar gyfer Ward Plant Cilgerran yr ysbyty.
Gwelodd yr her y tîm yn dringo'r tri chopa uchaf yng ngogledd, canolbarth a de Cymru – Yr Wyddfa, Cadair Idris a Phen y Fan – i gyd o fewn 24 awr.
Eu nod oedd codi arian i helpu plant ledled Sir Gaerfyrddin, Ceredigion a Sir Benfro sy'n wynebu salwch tymor byr, triniaeth barhaus, neu sy'n gwella ar ôl llawdriniaeth, yn ogystal â rhoi rhywbeth yn ôl i'r staff ar Ward Cilgerran sy'n darparu gofal a chymorth hanfodol.
Ac fe lwyddon nhw i godi cyfanswm o £6,390 ar gyfer ward y plant ar ôl cwblhau'r teithiau cerdded hynod heriol ym mis Medi.
Dywedodd Paul Hill, Rheolwr Ystadau Ysbyty Glangwili, fod yr her yn anodd ond yn werth chweil.
Dywedodd:
“Rydym yn credu bod pob plentyn yn haeddu’r gofal gorau a’r profiad gorau posibl pan fyddant yn sâl, ac rydym am roi rhywbeth yn ôl i dîm sy’n rhoi cymaint bob dydd.”
Ychwanegodd:
“Rydym yn hynod ddiolchgar i Wales Roofing Solutions am ymuno â ni ar yr her a chyfateb yr arian i’r her.”
Dywedodd Bethan Parry, Cydlynydd Gwerthoedd Cymdeithasol yn Wales Roofing Solutions:
“Roedd yn anrhydedd ymuno ag Adran Ystadau Ysbyty Glangwili a chymryd rhan yn Her tri chopa Cymru. O’r Wyddfa i Gadair Idris i Ben Y Fan, fe ddringon ni gydag un nod – cefnogi Ward Plant anhygoel Cilgerran. Roedd codi dros £6,000 yn anhygoel, yn enwedig gan wybod y bydd yn helpu i wneud gwahaniaeth ystyrlon i’r cleifion ifanc a’r teuluoedd sydd ei angen fwyaf.”
Dywedodd Bethan Osmundsen, Uwch Reolwr Nyrsio, Pediatreg Acíwt, y byddai'r rhodd yn gwneud gwahaniaeth gwirioneddol i'r cleifion.
Ychwanegodd:
“Rydym yn hynod ddiolchgar am y rhoddion hael a wnaed i Ward Cilgerran. Mae eich caredigrwydd yn cael effaith uniongyrchol a pharhaol ar y babanod, plant a phobl ifanc yn ein gofal, gan wella eu cysur, eu lles, a'u profiad cyffredinol i gleifion.
“Mae eich cefnogaeth yn ein helpu i greu amgylchedd mwy cadarnhaol, sy'n gyfeillgar i blant lle mae cleifion ifanc a'u teuluoedd yn teimlo'n ddiogel, yn cael eu cefnogi, ac yn cael gofal. Diolch am wneud gwahaniaeth gwirioneddol.”