Pobl ifanc sy'n heicio Pen y Fan yn codi £1,250 ar gyfer uned ddydd cemotherapi

Mae criw o bobl ifanc yn eu harddegau o Rydaman wedi cerdded ar hyd Pen y Fan er elusen.

Arweiniodd yr hyfforddwr pêl-droed Simon Jones ddau grŵp o’i chwaraewyr – Merched Clwb Pêl-droed Rhydaman o dan 15 a Dan 17 – i godi’r cyfanswm o £1,250 ar gyfer Uned Ddydd Cemotherapi Ysbyty Tywysog Philip.

Cerddodd y ddau dîm – ynghyd â grŵp o hyfforddwyr sy’n eu cefnogi a’u hyfforddi – i fyny Pen y Fan gyda’i gilydd ym mis Gorffennaf 2025, tra bod mab Simon, Leo hefyd wedi cerdded yr un llwybr wyth gwaith mewn 24 awr, heb stopio, a helpodd hynny i godi mwy o arian.

Mae'r uned cemo yn agos at galonnau'r chwaraewyr. Mae dwy o famau chwaraewyr y timau ar hyn o bryd yn cael triniaeth am ganser ac yn cael eu cefnogi gan staff meddygol yn Ysbyty Tywysog Philip. Mae gan Simon hefyd brofiad personol o uned cemotherapi’r ysbyty, gan fod ei fam hefyd wedi cael triniaeth yno eleni.

Dywedodd Simon fod y digwyddiad wedi mynd yn dda iawn a bod pawb a gymerodd ran wedi mwynhau.

Eglurodd:

“Roedd yna ymdeimlad ein bod ni’n gwneud rhywbeth i fod yn falch ohono, oherwydd y rheswm pam ein bod ni’n codi arian.”

Ac fe lwyddodd y grŵp i godi miloedd o bunnoedd, sydd i’w rannu ag ysbytai eraill.

Ychwanegodd Simon:

“Rydym wedi codi £1,250 ar gyfer pob adran, cyfanswm o £3,750 i'w rhoi.

“Hoffwn ddiolch i’r holl chwaraewyr, hyfforddwyr a rhieni a gymerodd ran. Hoffwn hefyd ddiolch i’r holl bobl hyfryd a gyfrannodd at yr achos gwych hwn.”

Dywedodd Kath Watkins, Uwch Brif Nyrs: “Ar ran staff a chleifion yr Uned Ddydd Cemotherapi yn Ysbyty Tywysog Philip, hoffwn ddiolch i dîm Merched Clwb Pêl-droed Rhydaman o dan 15 a Dan 17, hyfforddwyr, teulu, ffrindiau ac yn enwedig Leo am ymgymryd â’r her anodd hon, gyda’u hymdrechion codi arian yn arwain at gyfraniad hael iawn o £1,250.

“Rydym bob amser yn edrych ar ffyrdd o wella’r amgylchedd a gwella’r ffordd rydym yn gofalu am gleifion yn yr Uned Ddydd Cemotherapi. Byddwch yn dawel eich meddwl y bydd yr arian hwn yn mynd tuag at y gwelliant hwn. Diolch.”