Mae elusen y GIG yn cefnogi cleifion anadlol trwy ariannu dyfeisiau FeNO
Yn y llun uchod: Dyfais FeNO.
Mae Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda, wedi ariannu dwy ddyfais FeNO i’w defnyddio ar draws y bwrdd iechyd.
Mae dyfeisiau anadlu allan ocsid nitrig ffracsiynol (FeNO) yn profi pa mor llidus yw eich llwybrau anadlu. Gall hyn helpu i wneud diagnosis o asthma a hefyd monitro ymateb i driniaeth.
“Mae'r ddyfais yn mesur faint o ocsid nitrig ffracsiynol sy'n cael ei anadlu allan yn eich anadl. Os oes gennych lefelau uwch, mae hyn yn dangos bod eich llwybrau anadlu'n llidus gan arwain at reolaeth wael o asthma. Gellir rheoli'r llid hwn gyda meddyginiaethau asthma.
“Unwaith y byddwch yn cymryd meddyginiaethau asthma, dylai eich canlyniadau ddangos lefelau is o ocsid nitrig yn eich anadl o gymharu â lefelau cyn i chi ddechrau triniaeth. Mae hyn yn arwydd bod y meddyginiaethau yn gweithio i reoli'r llid. Os na chaiff y llid ei drin, gall achosi pyliau o asthma sy'n bygwth bywyd.
“Mae prynu’r peiriannau FeNO gan gronfeydd elusennol wedi galluogi’r Tîm Nyrsys Clinigol Arbenigol Rhyngwyneb Asthma i ddarparu’r prawf hwn yn nes at gartrefi cleifion mewn lleoliadau Gofal Sylfaenol ar draws Sir Benfro a Sir Gaerfyrddin.”
Dywedodd Nicola Llewelyn, Pennaeth Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda: “Mae cefnogaeth ein cymunedau lleol yn ein galluogi i ddarparu gwasanaethau y tu hwnt i’r hyn y gall y GIG ei ddarparu yn nhair sir Hywel Dda ac rydym yn hynod ddiolchgar am bob rhodd a dderbyniwn.”