Elusen y GIG yn ariannu hyfforddiant trawma ar gyfer Ymarferydd Trawma Mawr

Yn y llun uchod: Nina Victoria Brown, Ymarferydd Trawma Mawr.

Diolch i roddion hael, mae Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda, wedi gallu ariannu hyfforddiant trawma i Vicki Brown, Ymarferydd Trawma Mawr.

Mae'r Cwrs Trawma Ewropeaidd (ETC) yn gwrs amlddisgyblaethol uchel ei glod sydd wedi'i anelu at wella sgiliau trawma, gwybodaeth a gwaith tîm o fewn timau trawma.

Fel Ymarferydd Trawma Mawr, mae Vicki yn mynychu ac yn cefnogi galwadau trawma yn yr Adran Achosion Brys yng Nglangwili, sef Uned Trawma'r bwrdd iechyd, yn ogystal â darparu cyngor a chefnogaeth barhaus i Gleifion Trawma Mawr ledled y bwrdd iechyd.

Dywedodd Vicki: “Rwy'n hynod ddiolchgar bod cronfeydd elusennol wedi caniatáu i mi gymryd rhan yn yr hyfforddiant trawma yn Ysbyty Prifysgol Cymru yng Nghaerdydd.

“Mae ETC yn gwrs sydd wedi'i ddatblygu i ddysgu system ofal ar gyfer rheoli cleifion trawma sy'n adlewyrchu'r realiti rydyn ni'n ei brofi bob dydd. Nid yn unig y gwnaeth yr ETC wella fy ngwybodaeth a'm sgiliau clinigol ond canolbwyntiodd hefyd ar ryngweithiadau tîm gan fy ngalluogi i ddod yn fwy effeithiol fel aelod o dîm trawma ac i gefnogi arweinydd y tîm trawma yn well.

“Rwy'n gobeithio rhannu'r wybodaeth a'r sgiliau a gafwyd gyda chydweithwyr ar draws y bwrdd iechyd yn ein diwrnodau astudio Tîm Trawma Hywel Dda lleol a gynhelir yn Sir Benfro, Sir Gaerfyrddin a Cheredigion.”

Dywedodd Nicola Llewelyn, Pennaeth Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda: “Mae cefnogaeth ein cymunedau lleol yn ein galluogi i ddarparu gwasanaethau y tu hwnt i’r hyn y gall y GIG ei ddarparu yn nhai sir Hywel Dda ac rydym yn hynod ddiolchgar am bob rhodd a dderbyniwn.”