Côr yn codi dros £3,700 ar gyfer unedau cemo Hywel Dda

Yn y llun uchod: Côr Bytholwyrdd gyda Paige Denyer, Swyddog Cefnogi Codi Arian Elusennau Iechyd Hywel Dda.

Trefnodd Côr Bytholwyrdd gyngerdd a chodwyd £3,730 ar gyfer Unedau Dydd Cemotherapi Ysbytai Glangwili a Bronglais.

Côr i gantorion dros 60 oed o ardal Llanbedr Pont Steffan yw Côr Bytholwyrdd a ffurfiwyd ym mis Tachwedd 2019.

Cynhaliwyd y cyngerdd ar Fehefin 15fed yn Ysgol Bro Pedr yn Llanbedr Pont Steffan.

Dywedodd Rhiannon Lewis, Arweinydd Côr Bytholwyrdd: “Ynghyd â chystadlu yn ein Heisteddfodau lleol ac yn yr Eisteddod Genedlaethol yn Nhregaron (2022) a Phontypridd (2024), rydym yn mwynhau cefnogi digwyddiadau ac elusennau lleol a dod at ein gilydd i ganu a sgwrsio ar nos Fawrth.

“Yn ystod ein cyngerdd ym mis Mehefin, fe wnaethom berfformio’r oratorio cyfoes Cymraeg, 'Myfi Yw'. Ar gyfer y digwyddiad hwn, ymunodd pedwar unawdydd ifanc a llwyddiannus â ni, pob un â chysylltiad â’r ardal - Aled Wyn Thomas, Efan Williams, Ellis Dafydd a Rhys Maelgwyn Evans.

“Roedd y digwyddiad wedi gwerthu allan cyn y cyngerdd, ac yn ogystal â’r gwerthiant tocynnau llwyddiannus, cawsom ein noddi gan fusnesau lleol a ffrindiau a hefyd hysbysebwyr yn rhaglen y noson.

“Dewisom gefnogi Unedau Dydd Cemotherapi yn Ysbytai Bronglais a Glangwili gan mai dyma ein hysbytai lleol. Hefyd, ar adeg paratoi ar gyfer y digwyddiad hwn, roedd un o’n cantorion, Elfyn Davies, yn derbyn triniaeth yn uned Glangwili, mae rhai aelodau eraill hefyd wedi derbyn triniaeth yn un o’r unedau hyn yn y gorffennol ynghyd ag aelodau eraill o’r teulu a ffrindiau. Roeddem yn falch iawn bod Elfyn yn ddigon da i fynychu’r cyngerdd a chyflwyno’r siec ar ein rhan.

“Roedd yr ymateb yn y cyngerdd y tu hwnt i’n disgwyl. Hoffwn ddiolch i aelodau’r côr a Lois, ein cyfeilydd, am eu cefnogaeth, eu brwdfrydedd a’u ffyddlondeb. Mae Côr Bytholwyrdd yn llawn pobl arbennig iawn. Ar ran y côr, hoffwn ddiolch i’n teuluoedd a’n ffrindiau am eu cefnogaeth a’u hanogaeth barhaus. Ni fyddai’r digwyddiad hwn wedi bod yn bosibl heb y gefnogaeth. Rydym mor ffodus i fyw mewn ardal mor brydferth a chefnogol lle mae gofalu am ein gilydd yn dal i fod yn rhan bwysig o’n bywydau. Diolch o galon.”

Dywedodd Nicola Llewelyn, Pennaeth Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda: “Diolch i Gôr Bytholwyrdd am ein cefnogi yn ystod eu cyngerdd. Bydd eich rhodd yn gwneud gwahaniaeth enfawr i Unedau Dydd Cemotherapi yn Ysbytai Glangwili a Bronglais.

“Mae cefnogaeth ein cymunedau lleol yn ein galluogi i ddarparu gwasanaethau y tu hwnt i’r hyn y gall y GIG ei ddarparu yn nhai sir Hywel Dda ac rydym yn hynod ddiolchgar am bob rhodd a dderbyniwn.”