Bwrdd iechyd yn chwilio am arddwyr gwirfoddol i gefnogi mannau iachâd newydd yn Ysbyty Tywysog Philip

Yn y llun: Staff o wardiau Bryngolau a Mynydd Mawr

Mae Bwrdd Iechyd Prifysgol Hywel Dda yn galw ar bobl leol sy’n frwdfrydig dros arddio i wirfoddoli eu sgiliau i helpu i gynnal dwy ardd therapiwtig newydd yn Ysbyty Tywysog Philip, Llanelli.

Bydd y gerddi newydd, a grëwyd gyda chefnogaeth apêl codi arian diweddar, yn gwasanaethu ward Mynydd Mawr, uned adsefydlu gofal henoed 15 gwely, a ward Bryngolau, uned iechyd meddwl oedolion hŷn 15 gwely.

Disgwylir i'r gerddi gael eu hagor ym mis Ebrill 2026, a byddant yn darparu mannau diogel, llawen le gall cleifion fwynhau awyr iach, ymarfer corff ysgafn, a manteision adferol natur. Byddant hefyd yn cynnig amgylchedd heddychlon i staff ac ymwelwyr.

"Bydd y gerddi hyn yn gwneud gwahaniaeth enfawr i les ac adferiad ein cleifion," meddai Gareth Phillips, Uwch Nyrs Gofal ar ward Mynydd Mawr. "Mae cael gwirfoddolwyr i'w helpu i'w cynnal yn sicrhau eu bod yn parhau i fod yn fannau bywiog a chroesawgar i bawb."

Ychwanegodd Lauren Hughes, Rheolwr Ward ward Bryngolau: "Mae'r gerddi newydd wedi derbyn cefnogaeth mor anhygoel gan ein cymunedau lleol, ac rydym yn gobeithio y bydd hyn yn parhau gyda'n gwirfoddolwyr garddio a fydd wir yn cefnogi lles ar y wardiau."

Mae Hywel Dda yn chwilio am wirfoddolwyr sydd â phrofiad garddio a gwybodaeth ymarferol dda am gynnal a chadw gerddi tymhorol.

Dywedodd Nicola Llewelyn, Pennaeth Elusennau Iechyd Hywel Dda, elusen swyddogol y bwrdd iechyd: "Mae cefnogaeth barhaus gan ein cymunedau lleol mor bwysig. Gwnaed y gerddi hyn yn bosibl diolch i roddion hael, a bydd gwirfoddolwyr yn ein helpu i gynnal eu heffaith am flynyddoedd i ddod."

Rhaid cyflwyno datganiadau o ddiddordeb erbyn 26 Ionawr 2026 - anfonwch e-bost at: hdd.futureworkforceteam@wales.nhs.uk